دسمبر...!
مجھے تجھ سے کوئی شکایت نہیں ہے
نہ تجھ سے گلہ ہے
کہ تو نے مجھے بے سبب سی اداسی کا تحفہ دیا ہے
نہ مجھ کو تری سرد راتوں کی تنہائیوں میں
کسی اپنے غم کو جلا کر اُسے تاپنا ہے
نہ تجھ سے کوئی بات کہنی ہے مجھ کو
دسمبر....!
حقیقت یہی ہے کہ میں تیرے آنے سے پہلے بھی ایسا ہی تھا
نارسائی کے غم میں سلگتا
اداسی کی چادرمیں لپٹا
اور اپنے ہی اندر کی ویرانیوں پر
کبھی شعر کہتا
کبھی نظم لکھتا
دسمبر....!
حقیقت یہی ہے
ترے بعد بھی میرے معمول میں کوئی تبدیلی آئے
یہ ممکن نہیں
سالہا سال سے میں اسی دائرے میں سفر کر رہا ہوں
ترا دوش کوئی نہیں ہے دسمبر
مجھے تجھ سے کوئی شکایت نہیں ہے...!!
