,...تجھ سے ہاریں کہ تجھے مات کریں

تجھ سے ہاریں کہ تجھے مات کریں

تجھ سے خوشبو کے مراسم تجھے کیسے کہیں

میری سوچوں کا اُفق تیری محبت کا فسوں

میرے جذبوں کا دل تیری عنایت کی نظر

کیسے خوابوں کے جزیروں کو ہم تاراج کریں

تجھ کو بھولیں کہ تجھے یاد کریں

اب کوئی اور نہیں میری تمنا کا دل

اب تو باقی ہی نہیں کچھ

جسے برباد کریں

تیری تقسیم کسی طور ہمیں منظور نہ تھی

پھر سرزم جو آئے تو تہی داماں آئے

چن لیا دردٍ مسیحائی

تیری دلدار نگاہی کے عوض

ہم نے جی ہار دیئے، لُٹ بھی گئے

کیسےممکن ہے بھلا

خود کو تیرے سحر سے آزاد کریں

تجھ کو بھولیں کہ تجھے یاد کریں

اس قدر سہل نہیں میری چاہت کا سفر

ہم نے کانٹے بھی چنے روح کے آزار بھی سہے

ہم سے جذبوں*کی شرح نہ ہو سکی کیا کرتے

بس تیری جیت کی خواہش نے کیاہم کونڈھال

اب اسی سوچ میں گذریں گے مہ و سال مرے

تجھ سے ہاریں کہ تجھے مات کریں

.... بھری بہار میں

بھری بہار میں اب کے عجیب پھول کھلے

نہ اپنے زخم ہی مہکے ، نہ دل کے چاک سلے

کہاں تلک کوئی ڈھونڈے مسافروں کا سراغ

بچھڑنے والوں کا کیا ہے ، ملے ملے نہ ملے

عجیب قحط کا موسم تھا اب کے بستی میں

کیے ہیں بانجھ زمینوں سے بارشوں نے گِلے

یہ حادثہ سرِ ساحل رُلا گیا سب کو

بھنور میں ڈوبنے والوں کے ہاتھ بھی نہ ملے

سناں کی نوک، کبھی شاخِ دار پہ محسن

سخنوروں کو ملے ہیں مشقتوں کے صلے

محسن نقوی

~~ آخری گفتگو ~~

یہ تصویریں ہیں

خط ہیں

اور کچھ پُرزے ہیں

جن پر تُم مجھے پیغام لکھتی تھیں

انہیں محفوظ کر لو

ہاں مگر افسوس

ٹیلی فون پر جو گفتگو

تم مجھ سے کرتی تھیں

اُنہیں میں تم کو واپس کر نہیں سکتا

جو میری دسترس میں تھا

تمہارے سامنے ہے سب

جو باقی ہے

صدا ہے اب ۔۔۔۔

میں کیسے اس کو یقیں دلاؤں

عجب کشمکش کے راستے ہیں

بڑی کٹھن یہ مسافتیں ہیں

میں جس کی راہوں میں بِچھ گئی ہوں

اسی کو مجھ سے شکائتیں ہیں

شکائتیں سب بجا ہیں، لیکن

میں کیسے اس کو یقیں دلاؤں

اُسے بُھلاؤں تو

مر نہ جاؤں

میں اس خموشی کے امتحاں میں

کہاں کہاں سے گزر گئی ہوں

اُسے خبر بھی نہیں ہے شاید

میں دھیرے دھیرے

بکھر گئی ہوں

چاند سے روز پوچھتا تھا میں

چاند سے روز پوچھتا تھا میں

کس لئے اس قدر اُداس ہو تم؟

کس کی چاہت میں سال بھر پھیرے

سال بھر گھٹتے بڑھتے رہتے ہو تم

اُجڑے اُجڑے سے بکھرے بکھرے ہو

کیا ستارے تمہیں جگاتے ہیں؟

میرے ایسے کئی سوالوں پر

چاند نظریں چرا کے چھپ جاتا

اُوٹ میں بادلوں کی چھپ جاتا

آج مجھ پر جدائی آئی ہے

چاند سرگوشیوں میں پوچھتا ہے

ساتھی، اِتنے اُداس کیوں کر ہو؟

کس لئے تیری پلکیں بھیگی ہیں؟

کس لئے نیند تم سے روٹھی ہے؟

چاند سے ایسی گفتگو سن کر

آج میں نے نظر چرائی ہے

اپنے ہاتھوں میں منہ چھپایا ہے

اور رویا ہوں سسکیاں لے کر

ہم خود فریبی میں زندگی بِتاتے ہیں

ہم تمام زندگی

خوشیوں کی تلاش میں

بے حساب رنج و غم

اپنے دل پہ سہتے ہیں

جان تک گنواتے ہیں

نم آنکھوں سے ہنستے ہیں

اور خود سے کہتے ہیں

رنج عارضی ہیں یہ

خود فریبی ہے

سُن

اصل میں یوں ہوتا ہے

مختصر سی مدت میں

خوشیاں بیت جاتی ہیں

ہم خود فریبی میں

زندگی بِتاتے ہیں

ایک چراغ بجھتا ہے

دوسرا جلاتے ہیں

دشت و آس و یاس میں

ننگے پاؤں چلتے ہیں

خوشیوں کی تلاش میں

غم سمیٹ لیتے ہیں

...ہاتھ بھر کی دوری پر

اک نظر کی فرصت میں

سطح دل پہ کھل اُٹھے

لفظ بھی، معانی بھی

خامشی کی جھلمل میں

آگ بھی تھی، پانی بھی

دل نے ڈھرکنوں سے بھی

جو کہی نہیں تھی اب تک

ان کہی کہانی بھی

ان کہی کہانی میں

آنکھ بھر تمنا تھی

ہاتھ بھر کی دوری پر

لمس بھر کی قربت تھی

لمحہ بھر کا سپنا تھا

کتاب_دل میں جو نفرت کا باب رکھتا تھا

کتاب_دل میں جو نفرت کا باب رکھتا تھا

وہ چاہتوں کا مکمل حساب رکھتا تھا

فریب دیتا رہا دوستی کے پردوں میں

وہ شخص چہرے پہ کتنا نقاب رکھتا تھا

آج اس کے ہاتھوں میں پتھر دکھائی دیتا ہے

جو اپنے ہاتھ میں ہر دم گلاب رکھتا تھا

وہ شخص جو کہ بھٹکتا دکھائی دیتا ہے

راہ_وفا میں قدم کامیاب رکھتا تھا

کہاں تلاش کروں میں اس کو آج فراز

جو اپنی بات میں اپنا جواب رکھتا تھا

...معیار

خود کو تیرے معیار سے گھٹ کر نہیں دیکھا

جو چھوڑ گیا، اُس کو پلٹ کر نہیں دیکھا

میری طرح، تُو نے شبِ ہجراں نہیں کاٹی

میری طرح، اس تیغ پہ کٹ کر نہیں دیکھا

تُو دشنہِ نفرت ہی کو لہراتا رہا ہے

تُو نے کبھی دشمن سے لپٹ کر نہیں دیکھا

تھے کوچہِ جاناں سے پرے بھی کئی منظر

دل نے کبھی اس راہ سے ہٹ کر نہیں دیکھا

اب یاد نہیں مجھ کو فراز اپنا بھی پیکر

جس روز سےبکھرا ہوں سِمٹ کر نہیں دیکھا

احمد فراز

... دیر کتنی لگتی ہے

آگ ہو تو

جلنے

میں دیر کتنی لگتی ہے

برف کے پگھلنے میں‌ دیر

کتنی لگتی ہے

چاہے کوئی رک جائے، چاہے

کوئی رہ جائے

قافلوں کو چلنے میں دیر

کتنی لگتی ہے

چاہے کوئی جیسا بھی

ہمسفر ہو صدیوں سے

راستہ بدلنے میں دیر کتنی

لگتی ہے

یہ تو وقت کے بس میں ہے

کہ کتنی مہلت دے

ورنہ بخت ڈھلنے میں دیر

کتنی لگتی ہے

موم کا بدن لے کر دھوپ میں

نکل آنا

اور پھر پگھلنے میں‌ دیر

کتنی لگتی ہے

سوچ کی زمینوں میں راستے

جدا ہوں تو

دور جا نکلنے میں دیر کتنی

لگتی ہے