اُجالوں کی دعائیں دے رہا تھا میں زمانے کو
کہ اک سورج اتر آیا ہے میرا گھر جلانے کو
دریدہ جسم و جاں کےسارے موسم میرے موسم ہیں
پرائی دھوپ میں آیا ہوں سائے بچھانے کو
میں بجھ بھی جاؤں تو زندہ چراغوں میں مجھے رکھنا
کہ میں جلتا رہا ہوں آندھیوں کے آزما نے کو
وہ مٹی بن گئے ہیں جو تیری آنکھوں میں رہتے تھے
شکستہ کر گئیں پر چھائیاں آئینہ خانے کو
ترے رنگوں نے دیواریں اٹھا رکھی ہیں صحرا میں
بگولے تو بہت آئے مری آنکھیں بجھانے کو
اڑانوں سے پلٹ آتے ہیں اور پھر شور کرتے ہیں
پرندے بھی سمجھتے ہیں شجر کے ٹوٹ جانے کو
