اس کا چہرہ جو ذرا گردِ سفر سے نکلا
ایک طوفان قیامت کا نظر سے نکلا
یاد کرتا ہوں بہت دیر سے اس وقت کو میں
باندھ کر رختِ سفر جب کہ میں گھر سے نکلا
ہاۓ وہ لوگ بھی کیا لوگ تھے جو گھر میں رہے
میں تو گھر ہوتے بھی گھر ڈھونڈنے گھر سے نکلا
مشکلیں لاکھ سہیں ٹھوکریں کھائیں اکثر
جلد بازی کا نہ سودا کبھی سر سے نکلا
میں نے جس جس کو بھی چاہا تھا وہ آنسو بن کر
ایک اک کر کے میرے دیدۂِ تر سے نکلا
تم تو خاکی ہو میاں بات فرشتے کی ہے یاد
اس کا وہ حد سے گزرنا تھا کہ پر سے نکلا
یاد کرنے پہ بھی اب یاد نہیں آتا عدیل
کیا تھا وہ خواب کہ جس کے لئے گھر سے نکلا
عدیل زیدی
