تجھ سے مِل کر میں خوابوں کی دَلدل میں ہوں
یہ بدن خواب ہے
اِس کی ساری اداؤں کا فن خواب ہے
تیرا دھن خواب ہے
تیری ہستی گماں، میری پستی گماں، ساری بستی گماں
ہر گماں خواب ہے
خواب ہے ہر یقیں، خواب ہے ہر زمیں
آسماں خواب ہے
جلوہء نور بھی، شعلۂ طور بھی، گرمئ حُور بھی
ہستئِ دہر بھی، رونقِ شہر بھی، بیکراں بحر بھی
ان میں بھٹکا ہوا آدمی خواب ہے
ہر صدا بےصدا، ہر نظر بےبصر، ہر بشر در بدر
حرف و معنی جُدا
ان کو پڑھتا ہوا آدمی خواب ہے
روپ تعبیر کا، زخمِ تفسیر کا، نام تقدیر کا
رشتۂ درد بھی، جذبۂ سرد بھی، چہرہء زرد بھی
تیری ہمراہیاں، میری گُمراہیاں
روح کا رابطہ، سانس کا ضابطہ
ان سے ڈرتا ہوا آدمی خواب ہے
تجھ سے مل کر میں خوابوں کی دلدل میں ہوں
